◆惑 斋

侬读过《唐诗三百首》口伐？我讲个是新编《唐诗三百首》，作者是上海嘉定人唐大郎。伊原名唐云旌，上世纪30年代就是蛮有名气个职业报人。巅峰时期，伊每天要为六七家报纸赶稿，每家几百字一篇，亏伊从来勿脱班，是名气刮辣辣个“小报状元”，有“江南第一支笔”之称。1949年7月，唐大郎和老搭档龚之方合办《亦报》。1952年，《亦报》并入新民晚报社，唐大郎出任副刊部主任。1980年唐大郎病逝。

伊写个古体诗讲了交关当代故事，写到自家生活琐事、朋友交往，写到上海戏院、书场里交关明星，连勿少社会新闻也写进了诗里，一首首发表辣报纸浪，受到市民欢迎。伊姓唐，就叫自家写个诗为“唐诗”，编出来就叫《唐诗三百首》了。勿讲笑话：对阿拉上海人来讲，迭本新《唐诗三百首》，比几百年前个《唐诗三百首》更加接地气。

唐大郎个诗是一只“万花筒”，既有文人雅趣，又有市民生活，伊习惯用通俗个文字包裹五彩缤纷个感情。假使侬想感受当年小报文人个才情与生活，葛末读读伊个诗，肯定会让侬回味无穷。

唐大郎待人真诚、交游广阔：文娱界个周信芳、程砚秋、范雪君，文学界个夏衍、柯灵、吴祖光，电影界个费穆、洪深、桑弧，书画界个唐云、黄苗子、黄永玉，还有新闻界个陈灵犀、王尘无，闻名苏浙个书画僧石瓢和尚，侪是伊个老朋友，伊觉着搿点朋友侪是伊个骄傲！按照伊个讲法：“除了达官显宦……九流三教人物，认得实在勿少。”

品读“唐诗”，就像看一本老上海个方言词典，字里行间侪是浓浓个市井味道。伊写到舞厅个活跃，会得拿“探戈”迭个外来词拆开来弄成谐音：“老夫欲犯当年瘾，真想投池探一戈”；伊悼念亡妻写：“怕看支离多病骨，教人肠断忆临终”，表达了真挚个夫妻感情；写朋友追女明星个情场风波，借“诗注”拿前因后果写得比小说还发噱。大家认为“唐诗”里顶好白相个是诗注，常常比诗本身还要精彩：勿但补全了故事空白，喜怒哀乐也有小品文一样个风格，一记头拉近了读者距离；让人屏勿牢要笑！

伊写个诗里充满挂辣嘴边个上海口头语。譬如“出窠兄弟计双双”，“出窠”指上海话里从小一道长大个“发小”，但更加有江湖气，就像茄山河一样自然；还有原式原样保留了“巧克力美人”搿种对黑皮肤摩登女郎戏称；像“四角洋钿买香蕉”个七字句，就拿水果摊个叫卖声也写进去了。张爱玲佩服伊发明了“用诗注做新闻报道”。柯灵则称赞伊为人为文通体透明，有“水晶肚皮”风格。搿种文风让伊个诗成了上海个方言博物馆，充满了鲜活个上海特色。

对阿拉来讲，唐大郎个诗就像弄堂口大家熟悉个大饼油条，一口咬下去味道喷香。伊囥辣平仄、韵脚里个上海味道，土生土长个“老克勒”“老好婆”侪能品出妙处。如果讲唐诗里有平仄、押韵织成个都市文化密码。阿拉完全可以从“嗲”“噱”“扎台型”等关键词来解读。通过迭本《唐诗三百首》，读者能摸到当年上海石库门砖墙个温度，听到有轨电车“叮叮当当”铃声个回响。