文并图/沈一珠

大寒搿天，上海终于落雪了。尽管雪勿大，落落停停加起来也就个把钟头，勿过重要个是落过了。一年四季春夏秋冬，该热该冷，侪兜过一圈了。接下来就等开春，又是一个新轮回，日脚照旧过。

写搿篇文章个辰光，电脑里放个背景音乐正好是钟立风10年前唱个《爱情万岁》。伊是一个蛮有意思个歌手，写词写曲还写书。多年前蛮欢喜听伊个歌——看伊一面孔笑容开唱，腔调却苍凉又伤感。投五投六几年过去，快忘记伊个辰光，又忽然听到伊个声音。伊个歌，每一句侪高高低低弯弯绕绕，像一部短剧；一首唱完，又像讲完一部电影，从雪花纷飞个浪漫、美女如云、爱情万岁，一路唱到走过千山万水，头上沾了白雪个痕迹。长长个岁月，有时候三言两语就翻篇了，所谓白驹过隙，快得吓煞人。

天冷落雨夹雪，就懒得出门了。两天里接触顶多个，就是送外卖个小哥。老清老早，门把手浪就挂仔一份八宝饭——昨日网络平台买小菜，迭份八宝饭偏要隔日早浪送。小哥晓得阿拉还辣睏梦头里，拍照留了言。早浪买个小菜、大米咾啥也到了，搿趟小哥轻轻交敲了敲门。看得出来，伊拉培训蛮到位个：物事多就先堆辣地浪，看见我开门，再拎起来亲手交到手里。过脱一歇歇，跳出一条平台提醒：侬买个猪心今朝到期了，可以烧猪心炒蒜苗，蒜香浓郁，下饭首选。哦哟，阿拉屋里基本勿买蒜苗个。正巧早浪烧了热气腾腾个南瓜腊八粥，葛末就改烧猪心黄芽菜炒年糕，也算帮自家讨个好口彩：灶披间里一年忙到头，为屋里人烧烧弄弄，总归是开开心心个。

猪心切薄片，汏清爽沥干，加小苏打、生粉、盐、胡椒粉和料酒捏一捏，浆半个钟头左右。开油镬，热镬冷油，先拿葱姜煸香，再下猪心煸炒到八成熟，盛出来备用。黄芽菜切丝，油镬里煸出水，再拿年糕、猪心一道摆下去，调准咸淡翻炒均匀，盖镬盖烧三五分钟就好。