◆ 沈一珠

前一腔买了一只全自动咖啡机，就迭能，辣长长个一段吃咖啡个日脚里，从最开始个咖啡糖块、速溶咖啡，到后来买咖啡机配磨豆机磨粉，再到风靡一时个胶囊机，终于实现了“咖啡自动”。

想想，迭个世界真是越来越方便，跟全程手动追求过程个态度相比，揿一记拿铁，再揿一记美式迭种方式确实是简单粗暴了一点，不过，摆勒现在迭种大热天里，迭种爽爽气气个操作，祛烦解暑啊！

咖啡自动了几天，沾沾自喜中，快递又送来一只相同品牌个大盒子，吓了一跳，哦哟，阿是一勿当心手贱，下了两单啊？打开一看，是一只制冰机——呒没买过呀，马上打电话拨客服，对方讲，侬运道好，抽着奖了，迭个是奖品。哦，运道好，可遇勿可求。

就昨日，终于享着运道好个福了。高温天，工作室里有点小热，就依照说明书，拿搿只制冰机开起来。搿只机器看起来像一只小巧个面包机，操作起来蛮简单，加水，启动，六七分钟后，只听“咔咔”几声响，看内仓里落下来一堆一寸左右像空心小酒杯一样个冰块，等仔一歇歇，内仓里个冰拨一只“铲车”装置铲到外仓个冰篮里，马上拿冰块抄到杯子里，刚刚做好个美式咖啡一记头变成冰美式，一口落肚，略苦，微涩，爽口。

房间里空调“嗡嗡”响，房间外太阳辣豁豁，野乌子叫得声嘶力竭；大餐台浪新收到个一盆三角梅，花和叶子落得煞辣斯清，不过，新个嫩叶又“滋滋”冒出来了——独属于大热天里个烦恼，也是有解个，无非是顺势而为。

饭台子浪个哲学也一样。因为天热，一顿夜饭本来要清炒三两碟菜，现在就简化成清蒸，拣自家欢喜个荤荤素素，蒸一大盆，一小碗米饭，配只清清爽爽个海蜒冬瓜汤就好。

蒸三鲜做法：

无抗鸡腿三两只，拆骨切成丁，用黄酒、盐、葱、姜腌一小时左右；西葫芦小小一只，不用去皮，切丁备用；香菇若干只切丁，没有新鲜个，就泡发几只；总觉着，新鲜个香菇质地更滑嫩，泡发个香菇香气更浓郁，各有各个好。假使正好有开洋、青豆、玉米粒就零零星星配一点，口感饱满点，营养也丰富点。

备好个料摆到深盆里，加少许盐，天热，出汗多，可以吃得少许咸点；一点点生抽提鲜，一道拌匀，上蒸锅蒸15分钟就好，鸡肉鲜嫩Q弹，西葫芦酥软，加上香菇特有个香气，斜气开胃。