◆ 沈一珠

画室要搬场了，所以，有空辰光就开始整理，其实也呒啥多个事体，主要是拿画箱、颜料之类归归拢，勿要个包装纸箱之类拎出去厾厾脱。辣此地租迭套房子居然有4年了，房东老好，只收真真一点点钞票。要搬了，还真真有点勿舍得。返回个脚步宽松交关，看看走道旁边，也就一个礼拜左右，紫玉兰开足了，一部分花瓣已经零落为泥，而樱花又蓬蓬勃勃开出来了……

早上出去买菜，是昨日就想好个，烧一碗蚕豆蛤蜊鳜鱼汤。之所以有迭个想法，是因为最近朋友圈里侪勒晒花和诗，有一句记得老牢，是一位叫树才个当代诗人写个：“春天没有方向，春天只管开花。”走辣小区里随便看看，确实，花乱开，没头没脑个，樱桃花零零星星地留恋辣树间，青涩个樱桃已经挂上枝头了；素白个樱花居然已经接近尾声了，好像也就三两天个工夫；垂丝海棠正当时，白里透红个，让人想起小姑娘怀春又干干净净个笑容；迎春花、茶花、梨花，连紫藤花都羞羞答答点头了，居然，还闻着桂花香了，四季桂花顶勤快，初暖或者初寒，只要温度合适伊就开，走过路过，养心润肺；桃花呢？侪讲桃花已经来了呀，也勿晓得迓辣哪里；又想想，桃花迭种品种像煞并勿合适辣城里，就应该让伊野辣大自然里，十里桃花三生三世；又或者让人野了外头坐辣桃花下头写诗：西塞山前白鹭飞，桃花流水鳜鱼肥。青箬笠，绿蓑衣，斜风细雨不须归。

候分克数买了蛤蜊、蚕豆和一条鳜鱼，天热，也是到了要控制饮食个年纪，一天就用心准备一只小菜就好，再配点蔬蔬果果个，其他辰光用来画图、写字，看花乱开。

蛤蜊蚕豆鳜鱼汤：蚕豆剥成豆瓣；蛤蜊汏清爽，顶好养个半天，让伊拿泥沙吐出来；鳜鱼叫鱼老板汏清爽，开好花刀，回来冲清爽血水，沥干。

蛤蜊排好摆进空镬子，淋点料酒，加热，等蛤蜊一只只张开嘴巴，搛出来，汁水倒出备用；鳜鱼沥干，两面煎到焦黄，加姜片、葱段、适量盐、水以及蛤蜊汁，大火烧开滚5分钟左右；蚕豆、蛤蜊摆下去，大火再烧3分钟左右就好，原汁原味，是春天里独一无二个鲜味道。